Væntanlegt rit um skattalækkanir

Hinn 25. febrúar 2008 mun Háskólaútgáfan gefa út fyrir Félagsvísindastofnun nýtt fræðirit um skattamál, þar sem eru erindi nokkurra erlendra og innlendra fræðimanna, er þeir hafa haldið í Reykjavík um fræðilegar forsendur skattalækkana og reynsluna af þeim hér og erlendis.

Skattalækkanir til kjarabóta

Prófessor Pascal Salin (París) skrifar um skattasamkeppni frá hagfræðilegu sjónarmiði. Dr. Fredrik Bergström (Stokkhólmi) skrifar um, hvernig Svíar hafa dregist aftur úr öðrum þjóðum vegna þungrar skattbyrði. Dr. Daniel Mitchell (Washington-borg) skrifar um tilraunir til að hefta skattasamkeppni. Pierre Bessard (Lausanne) skrifar um stefnu Svisslendinga í skattamálum og hvað aðrar þjóðir geta lært af þeim. Prófessor Brendan Walsh (Dublin) skrifar um stefnu Íra í skattamálum og hvað aðrar þjóðir geta lært af þeim. Prófessor Hannes H. Gissurarson (Reykjavík) skrifar um íslenska efnahagsundrið, umskiptin í hagkerfinu 1991-2007. Prófessor Edward Prescott greinir tengslin milli skattlagningar og tilhneigingar fólks til að skapa verðmæti. Prófessor Ragnar Árnason skrifar um jöfnunaráhrif tekjuskatta.

Ritstjórar bókarinnar eru prófessor Hannes H. Gissurarson og dr. Tryggvi Þór Herbertsson.

Háskólaútgáfan gefur bókina út fyrir Félagsvísindastofnun. Útgáfutími: 25. febrúar 2008.

Höfundar

Edward C. Prescott er prófessor í hagfræði í Ríkisháskólanum í Arizona og félagi í hagrannsóknadeild Seðlabankans í Minneapolis. Hann hlaut Nóbelsverðlaunin í hagfræði 2004 ásamt Finn Kydland.

Daniel Mitchell lauk hagfræðiprófi frá Georgia-háskóla og doktorsprófi í hagfræði frá George Mason-háskólanum í Virginíu. Hann er nú aðalsérfræðingur Cato-stofnunarinnar í Washingtonborg í skattamálum, en starfaði áður hjá Heritage Foundation. Hann hefur tvisvar áður haldið fyrirlestra á Íslandi og einnig skrifað um íslenska efnahagsundrið í bandarísk blöð. Hann er höfundur bókarinnar The Flat Tax.

Pierre Bessard lauk prófum í viðskiptafræði frá Manhattan College og Syracuse University í New York, en er nú forstöðumaður Constant de Rebecque-stofnunarinnar í Lausanne í Sviss. Hann hefur víða skrifað og haldið fyrirlestra um skattamál með sérstöku tilliti til reynslu Svisslendinga.

Hannes H. Gissurarson er prófessor í stjórnmálafræði í Háskóla Íslands og situr í bankaráði Seðlabanka Íslands. Eftir hann er væntanleg á næstunni bók um hagkerfisbreytinguna á Íslandi 1991-2007.

Brendan Walsh er prófessor emeritus í hagfræði í University College í Dyflinni. Hann hefur skrifað fjölda bóka og ritgerða um írska hagkerfið, þar á meðal skatta- og peningamál.

Pascal Salin er prófessor í hagfræði í Parísarháskóla Dauphine. Hann hefur gefið út fjölda rita á móðurmáli sínu um hagfræði og frjálshyggju. Hann hefur verið forseti Mont Pèlerin-samtakanna, alþjóðlegra samtaka frjálslyndra fræðimanna.

Dr. Fredrik Bergström lauk doktorsprófi frá Hagfræðiskólanum í Stokkhólmi. Hann er forstöðumaður rannsóknasviðs Samtaka verslunarinnar í Svíþjóð og hefur birt bækur og ritgerðir um efnahagsmál.

Tryggvi Þór Herbertsson er 44 ára að aldri. Hann lauk doktorsprófi í hagfræði frá Háskólanum í Árósum og var forstöðumaður Hagfræðistofnunar Háskóla Íslands, þangað til hann gerðist 2007 bankastjóri Askar fjárfestingabanka.

Ragnar Árnason lauk doktorsprófi í hagfræði frá Háskólanum í Bresku Kólumbíu í Vancouver. Hann er prófessor í fiskihagfræði, sérfræðingur Alþjóðabankans í fiskveiðistjórnun og ráðgjafi ríkisstjórna um allan heim. Hann hefur gefið út fjölda rita um fiskihagfræði og önnur svið hagfræðinnar.

Frekari upplýsingar veitir Dr. Hannes Hólmsteinn Gissurarsson [hannesgi hjá hi.is]