Dagskrá

Þjóðminjasafnið
26. júlí 2007

Aðgangur ókeypis
og opinn öllum.

16.00 Geir H. Haarde forsætisráðherra: Setningarávarp
16.05 Edward Prescott: Labor and Taxes
16.45 Kaffihlé
17.00 Daniel Mitchell: The Nordic Tiger - Iceland
17.20 Pierre Bessard: Tax Competition - The Swiss Example
17.40 Jón Þór Sturluson: Comments
17.45 Birgir Þór Runólfsson: Comments
17.50 Fyrirspurnir og umræður
18.00 Björgvin G. Sigurðsson viðskiptaráðherra: Lokaorð
18.05 Móttaka í boði Viðskiptaráðuneytisins
Fundarstjóri: Ari Edwald

Skattalækkanir til kjarabóta

Síðustu sextán ár hafa skattar snarlækkað á Íslandi. Tekjuskattur á fyrirtæki lækkaði úr 45% árið 1991 í 18% árið 2001, og hefur verið svo síðan. Tekjuskattur ríkisins á einstaklinga lækkaði úr um 31% árið 1997 í um 23% árið 2007. Aðstöðugjald, hátekjuskattur og eignaskattur hafa allir verið felldir niður. Erfðafjárskattur hefur stórlækkað. Þrátt fyrir þetta hafa skatttekjur ríkisins af tekjuskatti fyrirtækja, einstaklinga og af fjármagnstekjuskatti aukist. Vegna skattalækkana og öflugra atvinnulífs hafa ráðstöfunartekjur almennings einnig hækkað.

Á ráðstefnu í Reykjavík 26. júlí munu nokkrir erlendir fræðimenn ræða það með íslenskum starfsbræðrum sínum, hvernig halda skuli áfram að lækka skatta.

Valda hærri skattar í Evrópu en Bandaríkjunum minni starfslöngun Evrópubúa?

Er flatur skattur á allar tekjur heppilegri en stighækkandi skattur?

Hvernig hefur Svisslendingum vegnað við miklu lægri skatta en tíðkast víðast hvar í Evrópu?

Getur Ísland orðið fjármálamiðstöð, ef skattar á fyrirtæki eru hér lækkaðir?

Geta kjör almennings batnað með skattalækkunum?

Þessar spurningar og ýmsar aðrar munu verða ræddar á þessari ráðstefnu, sem Félagsvísindastofnun Háskóla Íslands efnir til í samstarfi við ýmsa aðra aðila, svo sem Samtök atvinnulífsins, Háskólann í Reykjavík, Samtök iðnaðarins, Landssamband íslenskra útvegsmanna, VR, Viðskiptaráð og Samtök fjármálafyrirtækja.

Aðalstyrktaraðili ráðstefnunnar er Landsbanki Íslands.

Ráðstefna 14. september 2007: Ísland sem fjármálamiðstöð

Bók 10. janúar 2008: Cutting Taxes to Increase Prosperity

Ráðstefna 16. nóvember 2007: Íslenska efnahagsundrið?

Erindi 7. desember 2007: Hefur Ísland vikið af hinni norrænu leið?

Málflytjendur

Edward C. Prescott er 67 ára að aldri. Hann lauk háskólaprófum í stýrifræði og iðnaðarverkfræði, en er hagfræðiprófessor í Ríkisháskólanum í Arizona í Tempe og sérfræðingur í Seðlabankanum í Minneapolis. Hann hlaut Nóbelsverðlaunin í hagfræði 2004 ásamt samstarfsmanni sínu, Norðmanninum Finn Kydland, fyrir rannsóknir á hagstjórn og hagsveiflum. Eftir hann liggur fjöldi fræðirita, en hann skrifar einnig oft í Wall Street Journal.

Geir H. Haarde er 57 ára að aldri. Hann lauk hagfræðiprófi frá Brandeis-háskóla, meistaraprófi í alþjóðastjórnmálum frá Johns Hopkins-háskóla og meistaraprófi í hagfræði frá Minnesota-háskóla. Hann var fjármálaráðherra 1998-2005, utanríkisráðherra 2005-2006 og forsætisráðherra síðan. Hann varð formaður Sjálfstæðisflokksins 2005.

Björgvin G. Sigurðsson viðskiptaráðherra er 34 ára að aldri. Hann lauk prófum í sögu og heimspeki frá Háskóla Íslands og varð þingmaður Suðurlandskjördæmis 2003.

Daniel Mitchell lauk hagfræðiprófi frá Georgia-háskóla og doktorsprófi í hagfræði frá George Mason-háskólanum í Virginíu. Hann er nú aðalsérfræðingur Cato-stofnunarinnar í Washingtonborg í skattamálum, en starfaði áður hjá Heritage Foundation. Hann hefur tvisvar áður haldið fyrirlestra á Íslandi og einnig skrifað um íslenska efnahagsundrið í bandarísk blöð. Hann er höfundur bókarinnar The Flat Tax.

Pierre Bessard er 32 ára að aldri. Hann lauk prófum í viðskiptafræði frá Manhattan College og Syracuse University í New York, en er nú forstöðumaður Constant de Rebecque-stofnunarinnar í Lausanne í Sviss. Hann hefur víða skrifað og haldið fyrirlestra um skattamál með sérstöku tilliti til reynslu Svisslendinga.

Birgir Þór Runólfsson er 45 ára að aldri. Hann lauk doktorsprófi í hagfræði frá George Mason-háskóla í Virginíu. Hann er dósent í hagfræði í Viðskipta- og hagfræðideild Háskóla Íslands, sat lengi í bankaráði Landsbankans og er nú varamaður í bankaráði Seðlabanka Íslands.

Jón Þór Sturluson er 37 ára að aldri. Hann lauk doktorsprófi í hagfræði frá Stockholm School of Economis. Hann er dósent í hagfræði í Háskólanum í Reykjavík og situr í bankaráði Seðlabanka Íslands.

Frekari upplýsingar veitir Dr. Hannes Hólmsteinn Gissurarsson [hannesgi hjá hi.is]